BRINDISI  BEDDA  MIA    (N.)

“Brindisi, bedda mia, Brindisi amata”,
lu cori si scuresci quando piensi
a comu lu prugressu t’è cangiata,
comu t’è fattu pèrdiri li siensi…

Lu Casali era tuttu nu sciardinu
t’erva ti vientu e ti cucumiddùni,
l’addori si sintia ti putrisinu
quandu passavi sott’alli balcuni.

Abbasciu alla marina, a tutti l’ori,
‘ttraccàunu peschereggi e bastimenti:
cantàunu piscaturi ‘ntra l’addori
ti pesci friscu, resina e sarmienti.

Mari pulitu, cielu cristallinu,
paranzi a rimi, mattri cull’alici,
puru ti li funtani assia lu vinu,
l’aggenti era 'cchiù bona e 'cchiù filici.

Mo’ lu Casali è campu ti battaglia,
‘mbugghicatu ti casi e ti palazzi,
tagghiatu a piezzi, a ‘mmanu a na ‘ggintaglia
ca l’è sbintratu a botta ti ‘ntrallazzi…

Mo’, quandu è sera, abbasciu alla marina
lu cielu è ‘nfumicatu e l’aria scura
ti porta nu qualeru ti sintìna
ca cu rispìri t’ha pigghià paura.

Mo’ no’ càntunu 'cchiù li piscaturi:
mo’ sobbr’alli culonni, ogne mumentu,
ti ‘ntrònunu li recchi ti rimùri.
…Chiangi Maria sobbr’allu monumentu.

 

Nota)  Il primo verso, debitamente posto fra virgolette, è tratto da una poesia del Canonico Luigi De Marco.